Մաքրեք լյարդը՝ արևադարձային հրաշք սմուզիով
Լյարդը մարդու ամենակարևոր օրգաններից մեկն է: Այն օրգանիզմի ֆիլտրն է, որն օգնում է ազատվել օրվա ընթացքում օրգանիզմում կուտակված տոքսիններից:
Լյարդի աշխատանքին օգնելու լավագույն ձևերից մեկը ճիշտ մթերքների օգտագործումն է: Գոյություն ունեն մի քանի մթերքներ, որոնք կարող եք օգտագործել՝ լյարդի ֆունկցիան լավացնելու համար:
Healthyfoodhouse կայքը ներկայացրել է մի հրաշք կանաչ ըմպելիք, որի պարունակության մեջ մտնում են կիտրոնի հյութ, կոճապղպեղ և քրքում:
Բաղադրություն
- 2 բաժակ արքայախնձոր
- 2 բաժակ կաղամբ
- 2 բաժակ կոկոսի հյութ
- 1 բաժակ մանգո
- 1 ճ/գ թարմ աղացած կոճապղպեղ
- Կես թ/գ աղացած քրքում
Բլենդերի մեջ խառնեք կոկոսի հյութն ու կաղամբը, խառնեք՝ մինչև համասեռ զանգված ստանալը: Ապա ավելացրեք մնացած բաղադրիչներն ու կրկին խառնեք՝ մինչև համասեռ զանգված ստանալը: Եթե ըմպելիքը չափազանց խիտ է ստացվել, կարող եք մի փոքր էլ կոկոսի հյութ ավելացնել: Այս չափաքանակը բավական է 2 հոգու համար:
Կարող եք այս հյութը խմել առավոտյան նախաճաշին կամ օրվա մյուս ժամանակահատվածներին՝ ըստ ցանկության:
Սննդարար հատկանիշները
Այս հրաշալի հյութն ունի հազարավոր սննդարար հատկանիշներ: Կիտրոնի հյութն ունի միզամուղ հատկանիշ, ինչն էլ օգնում է օրգանիզմից դուրս բերել տոքսինները: Կոճապղպեղն ունի շատ հակաօքսիդանտներ և հակաբորբոքային հատկանիշներ: Հավելյալ, կոճապղպեղն օգնում է նաև մարսողությանը:
Միակ բաղադրիչը, որի մասին հնարավոր է, որ չգիտեիք, քրքումն է: Ամեն օր լսում ենք, որ քրքումն առողջ սննդակարգի անբաժանելի մասն է: Քրքումը հաճախ հանդիպում է աղացած տեսքով: Քրքումի արմատը նման է կոճապղպեղին և տարածված է Ասիայում և Պոլինեզիայում:
Քրքում օգտագործում են բուժական տարբեր միջոցների մեջ, այն օգտագործվում է նաև՝ որպես համեմունք, որն ուտելիքին դեղին գույն է տալիս: Քրքումի հավելումը սննդակարգին շատ կարևոր է առողջության համար:
Նյութը հրապարակման պատրաստեց Լիլիթ Հարությունյանը
