«Լինսի» հիմնադրամի փակումը կապ չուներ Հայաստանի հետ. Հարութ Սասունյան. «Ազատություն»
«Կալիֆորնիա կուրիեր» թերթի գլխավոր խմբագիր, «Լինսի» հիմնադրամի նախկին փոխնախագահ Հարութ Սասունյանի պնդմամբ՝ լուրերը, թե ամերիկահայ միլիարդատեր Քըրք Քըրքորյանը իր տրամադրած միջոցների փոշիացման պատճառով է փակել հիմնադրամը, չեն համապատասխանում իրականությանը։
«Բոլոր խոսակցությունները, որ միշտ լսում էինք, թե ինքը դժգոհ էր, «Լինսի»-ն փակել էր, որովհետև իր փողերը փոշիացրել են, սուտ են և կեղծիք։ Պետք չէ ազնիվ աշխատանքը կապել քաղաքական վեճերին։ Պարոն Քըրքորյանը տրամադրել է, մոտիկից հետևել է, թե ինչպես են ծախսվում իր փողերը, ուր են գնում, և արդյունքն իր աչքով տեսել է»,- «Ազատությանը» ասաց Սասունյանը։
«Լինսի» հիմնադրամի գործունեության դադարեցումից հետո հիմնադրամում առկա դրամական միջոցները` 200 միլիոն դոլար, փոխանցվեցին Կալիֆորնիայի համալսարանին։ Սասունյանն ասում է՝ Քըրքորյանը հիմնադրամի գործունեությունը դադարեցրեց, քանի որ առաջացած տարիքի պատճառով չէր ուզում իրեն ծանրաբեռնել։
«Փակելու պատճառը իր հասուն տարիքն էր, 95 տարեկան էր, չէր ուզում այլևս զբաղվել ամենօրյա նամակներով, խնդրանքներով և նախօրոք, տարիներ առաջ ծրագրել էր, որ երբ որոշակի տարիքի հասնի, փակելու է հիմնադրամը, իր ունեցած հարստությունը դնելու է իր կտակի մեջ, և հետմահու իր հարստությունը բաժանվելու է բարեսիրական նպատակների համար։ Շատ պարզ, հստակ պատճառ կար, որ ինքը փակեց «Լինսի»-ին։ Դա ոչ մի կապ չուներ ո’չ ծրագրերի, ո’չ Հայաստանի, ո’չ հայության հետ»,- ասաց Սասունյանը։
Ամբողջությամբ՝ սկզբնաղբյուր կայքում:
