Մենք պետք է դադարեցնենք մարդու իրավունքները խախտող երկրների հետ համագործակցությունը. Դունյա Միյատովիչ
Ադրբեջանական Turan լրատվական գործակալության փոխանցմամբ՝ Ռիգայում տեղի է ունեցել «Մեդիայի դերն Արևելյան գործընկերությունում» ԶԼՄ-ների առաջին կոնֆերանսը:
Եվրոպայի խորհրդի մարդու իրավունքների հարցերով հանձնակատար Նիլս Մույժնիեքսը հայտարարել է, որ 2014 թվականը վատ տարի է եղել ԶԼՄ-ների ու մարդու իրավունքների համար, սակայն 2015 թվականին առկա են էլ ավելի վատթար ցուցանիշներ:
ԵԱՀԿ-ի՝ ԶԼՄ-ների ազատության հարցերով հատուկ ներկայացուցիչ Դունյա Միյատովիչը հայտարարել է, որ «Արևելյան գործընկերության» երեք երկրներում՝ Հայաստանում, Ադրբեջանում ու Բելառուսում, նկատվում է լրագրողության ազատության վատթարացում, իսկ Վրաստանում, Ուկրաինայում ու Մոլդավայում առկա է ԶԼՄ-ների մասնակի ազատություն:
Միյատովիչը հատուկ ուշադրություն է հատկացրել Ադրբեջանում տիրող իրավիճակի վրա, ուր փակվել է «Ազատություն» ռադիոկայանի բյուրոն, և կալանքի տակ են գտնվում ավելի քան մեկ տասնյակ լրագրողներ ու բլոգերներ, իսկ Լրագրողների ազատության ու անվտանգության ինստիտուտի ղեկավար Էմին Հուսեյնովը հալածանքներից թաքնվում է Բաքվում գտնվող Շվեյցարիայի դեսպանատանը.
«Մենք պետք է իրերն անվանենք իրենց անուններով և դադարեցնենք մարդու իրավունքները խախտող երկրների հետ համագործակցությունը»:
