Աշխատանքի պաշտպանության կանոնները խախտելու հետևանքով հոսանքահարվել է և մահացել. 2 անձի առաջադրվել է մեղադրանք
ՀՀ քննչական կոմիտեի Երևան քաղաքի քննչական վարչության Մալաթիա-Սեբաստիա վարչական շրջանի քննչական բաժնում քննվող քրեական գործով երկու անձի մեղադրանք է առաջադրվել աշխատանքի պաշտպանության կանոնները խախտելու հետևանքով անզգուշությամբ մահ պատճառելու համար։
Նախաքննությամբ պարզվել է, որ 15.07.2014թ. Արմավիր մարզի գյուղերից մեկում կատարվել են «Բաղրամյան» էլեկտրացանցի սպասարկման և շահագործման տակ գտնվող բաժանիչի փոխարինման աշխատանքներ: Ա.Հագոյանը և Խ.Ներսիսյանը, լինելով կատարվող աշխատանքների բրիգադայի անդամ, չեն կատարել շարժական հողանցման տեղադրում, որի արդյունքում աշխատանքների իրականացման ընթացքում Կ.Սարգսյանը, նույնպես լինելով բրիգադայի անդամ, հոսանքահարվել է և մահացել:
Ձեռք բերված ապացույցների համակցությամբ Ա.Հագոյանին և Խ.Ներսիսյանին առաջադրվել է մեղադրանք ՀՀ քրեական օրենսգրքի 157-րդ հոդվածի 2-րդ մասի հատկանիշներով:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
