Վրաստանի ու Ռուսաստանի նախագահների հանդիպման հարցը դեռ չի քննարկվում. Կերեսելիձե
Ռուսական РИА Новости լրատվական գործակալության փոխանցմամբ՝ Վրաստանի ու Ռուսաստանի դիվանագետները դեռ չեն քննարկում երկու երկրների նախագահների հանդիպում անցկացնելու հարցը:
Այս մասին լրագրողների հետ ասյօրվա զրույցում հայտարարել է Վրաստանի ԱԳՆ-ի խոսնակ Դավիթ Կերեսելիձեն. «Ես կրկնում եմ, որ դիվանագետների միջև խոսք չի գնում հանդիպում անցկացնելու մասին»:
Ավելի վաղ Ռուսաստանի նախագահի մամլո քարտուղար Դմիտրի Պեսկովը հայտարարել էր, որ Ռուսաստանի ու Վրաստանի դիվանագետները չեն բացառում երկու երկրների նախագահների հանդիպման հնարավորությունը:
Վրաստանի նախագահի աշխատակազմը քանիցս հայտարարել է, որ հանդիպումը կարող է տեղի ունենալ այն դեպքում, եթե բանակցությունների գլխավոր նպատակը լինի երկրների միջև ամենասուր խնդիրների լուծումը:
