Նեմցովին սպանել են Ուկրաինայի դեպքերի պատճառով. Վերշբոու
BBC-ի ռուսական ծառայության փոխանցմամբ՝ ՆԱՏՕ-ի գլխավոր քարտուղարի տեղակալ Ալեքսանդր Վերշբոուն հայտարարել է, որ իր կարծիքով՝ ռուս ընդդիմադիր քաղաքական գործիչ Բորիս Նեմցովի սպանությունն այս կամ այն կերպ կապված է Ուկրաինայի դեպքերի հետ:
Վերշբոուի խոսքերով՝ Նեմցովը վերջին շրջանում առաջին հերթին դեմ է հանդես եկել Ուկրաինայի արևելքի հակամարտությանը Մոսկվայի ռազմական մասնակցությանը: Նա հավելել է, որ Նեմցովի սպանությունից առաջ հայտնի էր դարձել, որ Ուկրաինա ռուսական ներխուժումը գնալով ավելի քիչ աջակցություն է ստանում ռուս հասարակությունում.
«Նախագահ Պուտինի նպատակը, կարծես թե, Ուկրաինան թուլացնելն է և Ռուսաստանում այլընտրանքային կարծիքները ճնշելը՝ կանխելու համար ռուսական Մայդանի ի հայտ գալը: Նախորդ ուրբաթ Բորիս Նեմցովի դաժան սպանությունից հետո մենք տեսնում ենք, որ (այդ հակամարտության) զոհեր կան ոչ միայն Ուկրաինայի արևելքում:
Թեև մենք տեղյակ ենք, թե ով է քաշել ձգանը, մենք հասկանում ենք, որ Բորիս Նեմցովը ժողովրդավարության պաշտպան էր և դեմ էր Ուկրաինայի դեպքերին Ռուսաստանի միջամտությանը: Այսինքն, նա նրանցից մեկն էր, որոնց ռուսական պաշտոնական քարոզչությունն անվանում է «դավաճաններ» և «հինգերորդ շարասյուն»»:
Նեմցովի օգնական Օլգա Շորինան Reuters գործակալությանը հայտնել էր, որ Նեմցովը վերջին օրերին ավարտում էր Ուկրաինայի արևելքի հակամարտությանը ռուսական զորքերի դերակատարության մասին իր զեկույցի վրա աշխատանքները:
