Human Rights Watch-ը եվրոպացի առաջնորդներին կոչ է արել Ադրբեջանից պահանջել ազատել քաղբանտարկյալներին
Ադրբեջանական Turan լրատվական գործակալության փոխանցմամբ՝ Human Rights Watch (HRW) միջազգային իրավապաշտպան կազմակերպությունն Ադրբեջանում Եվրոպական խաղերի մեկնարկից 100 օր առաջ պահանջել է ազատ արձակել երկրում կալանավորված լրագրողներին ու հասարակական ակտիվիստներին:
HRW-ի Եվրոպայի ու Կենտրոնական Ասիայի հարցերով տնօրեն Ջեյն Բյուքենենը հայտարարել է. «Լրագրողների, իրավապաշտպանների ու ակտիվիստների վրա կառավարության հարձակումները մարտահրավեր են Մարդկային արժանապատվության ու մամուլի ազատության օլիմպիական խարտիայի սկզբունքների ոգուն»:
HRW-ը եվրոպացի առաջնորդներին կոչ է արել զգուշացնել Բաքվին, որ եթե նա չազատի կալանավորված ընդդիմադիրներին, ապա իրենք այդ խաղերի համար չեն ուղարկի բարձրաստիճան պատվիրակություններ:
Հիշեցնենք, որ Amnesty International-ն իր հերթին հայտարարել է, որ Ադրբեջանում Եվրոպական խաղերը կանցկացվեն քաղաքական բռնությունների ֆոնին:
