Սուպերմարկետից գողության փորձ կատարած տղամարդուն ազատ են արձակել
Օրերս համացանցում և մամուլում տեսանյութ տարածվեց, ըստ որի՝ փետրվարի 7-ին Մաշտոցի պողոտայի և Ամիրյան փողոցի խաչմերուկից Ճանապարահային ոստիկանութան 1-ին սպայական 2-րդ դասակի տեսուչներ Հովհաննես Մանուչարյանն ու Արտակ Սարգսյանը Մաշտոց 18 հասցեում գտնվող SAS սուպերմարկետից հափշտակություն կատարելուց հետո՝ խանութից փախուստի դիմած մի տղամարդու են հետապնդել ու բռնել: Այդ քաղաքացին 45-ամյա Հակոբ Մարությանն է, ով բնակվում է Երևան քաղաքի Աղյուսագործների փողոց թիվ 69 տանը:
168.am-ը փորձեց ճշտել, թե ինչո՞ւ է տղամարդը փորձել գողություն անել և ինչո՞ւ է հենց նրա այդ քայլը նման արձագանք գտել, արդյո՞ք նրա այդ քայլը պայմանավորված էր սոցիալական ծար պայմաններով:
Պարզվեց՝ Հակոբ Մարությանին արդեն ազատ են արձակել, քանի որ քիչ առաջ մենք նրան հանդիպեցինք իր տանից դուրս գալու պահին և փորձեցինք զրուցել նրա հետ: Իմանալով, որ լրագրող ենք՝ նախ նա վրդդովեց և ասաց, որ ոչինչ չի ուզում ասել, հետո հայտարարեց. «Ամոթ էլ չեք անում, խմած եմ եղել, մի բան ա՝ արել եմ, սարքել եք չգիտեմ՝ ինչ: Ես նորմալ աշխատող մարդ եմ, էդ ժամանակ չեմ իմացել՝ ինչ եմ անում»:
Նշենք նաև, որ դատելով այն տնից, որտեղից դուրս եկավ Հ. Մարությանը, նա սոցիալական վատ վիճակում չէ ապրում:
Հիշեցնենք, որ քիչ առաջ ՀՀ ոստիկանության հասարակայնության հետ կապերի վարչության պետ Աշոտ Ահարոնյանը ֆեյսբուքյան իր էջում այդ կապացությամբ գրառում էր կատարել, քանի որ տեսանյութը մեծ արձագանք էր ստացել համացանցում: Շատերին զայրացրել էր ոստիկանների կողմից այդ տղամարդուն բռնելու՝ շոու հիշեցնող տեսարանը:
Ի դեպ, մեր տեղեկություններով, սուպերմարկետի աշխատակիցները Հակոբ Մարությանի ձեռքից վերցրել էին «գողոնը»:
