«Մենք հիմա 1000 դրամ էլ ի վիճակի չենք վճարելու. մեր պահանջն օրենքը կասեցնելն է». Տաքսու վարորդ

Կառավարության կողմից կատարված լիցենզավորման նոր կարգն  այսօր չի գոհացնում անհատ ձեռներեց տաքսու վարորդներին, ու նրանք հայտարարում են՝ բոյկոտել նոր կարգը: Այսօր ասուլիսին հրավիրված հյուրերն անհատ տաքսու վարորդներն էին, որոնք հայտնեցին իրենց դժգոհությունը նոր լիցենզավորման օրենքի համար և նշեցին, որ հիմա իրենց հստակ տեղեկացրել են ամսական 12 հազար դրամ վճարման մասին, բայց թե ինչի՞ համար պետք է վճարեն այդ գումարը, վարորդները չգիտեն: «Այսօր 12 հազար դրամն անհատ վարորդների համար  «թիվ» է, մենք այսօր չունենալով պայմաններ, կայանատեղիներ՝ պետք է այդքան գումար ամսական վճարենք ու չգիտենք՝ ինչի համար: Մենք այսօր պահանջում ենք կասեցնել որոշումը կամ, լավագույն դեպքում՝ իջեցնել 12 հազար դրամի շեմը»,- այսպես հայատարարեցին ասուլիսին հրավիրված վարորդները:

Այժմ տաքսու վարորդներին, բացի 12 հազար դրամը վճարելու փաստից, մտահոգում է նաև ուրիշ հարց. նրանց խոսքով՝ այս օրենքն ընդունելով՝ դժվար կլինի տարբերակել իսկական տաքսու վարորդին սովորական քաղաքացուց, որը պարզապես աշխատանքից հետո տաքսի է վարում ու մի քանի պատվեր կատարելուց հետո վերադառնում տուն: Նրանք պահանջում են՝ նախապես կարգավորել ոլորտը, հետո նոր լիցենզավորման կարգ սահմանել: «Եթե այսօր ցանկացած ձեռներեց  «ձեռի հետ» տաքսի է վարում, ուրեմն՝ հիմա ցանկացածը կարող է գալ, վերցնել այդ կտրոնը ու աշխատել՝ որպես տաքսու վարորդ: Իրական տաքսու վարորդը հիմա արդեն վատ է զգում, որ բոլորը կարող են տաքսի վարել: Եվ հիմա 12 հազար դրամ վճարելով՝ բոլորն էլ հավասար են դիտվում. տաքսի վարում են այսօր Պահակային վարչության աշխատողները, Պաշտպանության նախարարության աշխատակիցները, տարբեր ձեռներեցները, մսավաճառները, առևտրականները՝ բոլոր-բոլորը: Այդ կտրոնը չի ասում՝ դու չես վարելու, դու մասնագետ չես…»,- ասում է վարորդներից մեկը:

Վարոդները նաև նշեցին, որ կառավարությունն օրենքն ընդունելիս նրանց հետ չի խորհրդակցել, և հիմա այդ նշված պայմանները վարորդներին պարտադրում են կատարել: «Մեր պահանջները ոչ մի կերպ չբավարարվեցին. նստեցին, որոշեցին, իրենց համար պայմանները ստեղծեցին, որպեսզի սկսեն նորից տուժած ժողովրդին քամելու արարողությունը: Նոր օրենք են ուզում կիրառեն ու մեզանից նորից գանձեն, այն դեպքում՝ երբ այսօր համատարած ամբողջ քաղաքն ինչ-որ տեղից մեքենաներ է վերցնում ու որպես տաքսի վարում,- ասում է վարորդներից մեկը՝ հավելելով,- Հիմա էլ տարեկան լիցենզավորման համար անհատ ձեռներեց գոյություն չի ունենալու, եթե անհատ ձեռներեց եք ուզում դառնալ, պետք է մուծեք տարեկան  100 հազար դրամ, իսկ եթե վարորդն ունի մեկից ավելի մեքենա, անհատ ձեռներեցը ստիպված է նորից 100 հազար դրամ վճարել (նոր օրենքով անհատ ձեռներեցը կարող է ունենալ 4 մեքենա): Մինչև այդ այդպիսի օրենք գոյություն չուներ, կար անհատ ձեռներեց, որը 25 հազար դրամ փող էր վճարում լիցենզիայի համար և կարող էր 3 մեքենա ունենալ»,- ասում է տաքսու վարորդ Մխիթար Օհանյանը:

Հարցին՝ որքա՞ն եք պատրաստ վճարել, եթե ոչ՝ 12 հազար դրամ, վարորդներից մեկը պատասխանեց. «Մենք հիմա 1000 դրամ էլ ի վիճակի չենք վճարելու. մեր պահանջը կասեցնելն է՝ անորոշ ժամանակով ու օրենքով սահմանել մի գումար, որ մենք կարողանանք  վճարել դա: Մենք չենք ուզում տարեկան լիցենզիա, ամսական վճարումներ. մի գումար թող հստակ որոշեն՝ վճարենք, ու վերջ: Իսկ ներկա դրությամբ մենք ի վիճակի չենք վճարելու այդ 12 հազար դրամը, մեր պահանջը ոլորտը կարգավորելն է և նորմալ գումար հաստատելը»:

Վարորդներն այսօր հստակ որոշել են՝ հիգշաբթի օրը  հավաքվելու են կառավարության շենքի դիմաց և, ինչպես նրանք նշեցին. «Հավաքվելու ենք մեքենաներով, որպեսզի «կատաստրոֆայի» ենթարկենք քաղաքը, որ մեզ հետ սրանից հետո հաշվի նստեն»:

Լուսանկարըՙ հեղինակի