ՀԱՊԿ-ի երկրների առաջնորդներն ընդգծել են Ղարաբաղյան հակամարտության խաղաղ կարգավորման անհրաժեշտությունը
Ռուսական ТАСС լրատվական գործակալության փոխանցմամբ՝ ՀԱՊԿ-ի երկրների առաջնորդներն այսօր Կրեմլում տեղի ունեցած գագաթաժողովի արդյունքներով ընդունել են 22 փաստաթուղթ: Պետությունների ղեկավարները հավանության են արժանացրել մեկ համատեղ հայտարարություն, 19 որոշում ու 2 արձանագրություն:
Իրենց հայտարարությունում ՀԱՊԿ երկրների ղեկավարները մտահոգություն են հայտնել Կենտրոնական Ասիայում ահաբեկչական վտանգի ընդլայնման ու ծայրահեղականության տարածման կապակցությամբ, այդ թվում նաև հաշվի առնելով աֆղանական գործոնը:
Հայտարարությունում ընդգծվում է Ուկրաինայում խաղաղության վերականգնման ու Ղարաբաղյան հակամարտության խաղաղ կարգավորման անհրաժեշտությունը, այսինքն նրանք ֆիքսել են տարածաշրջանային հիմնական խնդիրների հանդեպ իրենց դիրքորոշումը:
ՀԱՊԿ-ի երկրների ղեկավարներն անհրաժեշտ են համարել տեղեկատվական տիրույթում միջազգային իրավունքի նորմերի ու սկզբունքների պահպանումը: ՀԱՊԿ-ի երկրներն ընդգծել են, որ ահաբեկչությունն ամրապնդվում է թվաքանակի, գաղափարական ու ֆինանսական առումներով և սկսել է ինքնուրույն դեր խաղալ տարածաշրջանային հակամարտություններում՝ օգտագործելով միջդավանաբական ու միջէթնիկ հակասությունները:
