Արևմուտքը, հարկ եղած դեպքում, միշտ էլ փորձում է որոշակիորեն քննադատել Ադրբեջանին. ադրբեջանագետ
ԱՄՆ պետդեպարտամենտի մամլո քարտուղար Ջեն Փսակին Ադրբեջանի կառավարությանը կոչ է արել պահպանել մարդու հիմնարար իրավունքները: Փսակին այդ կերպ է մեկնաբանել «Ազատություն» ռադիոկայանի թղթակից Թուրհան Քերիմովին ձերբակալելը: Ի պատասխան՝ Ադրբեջանի ԱԳՆ-ն ԱՄՆ-ին հիշեցրել է նրա դատաիրավական համակարգի թերությունների ու ռասայական խտրականության մասին:
168.am-ի հարցին՝ նման դեպքերը կարծես հաճախակի են դառնում, արդյոք լարվա՞ծ են Ադրբեջան-ԱՄՆ հարաբերությունները, ադրբեջանագետ Սարգիս Ասատրյանը պատասխանեց.
«Ադրբեջանի գրեթե բոլոր պաշտոնական դեմքերը Փսակիի հայտարարությանն անդրադառնալով՝ նշել են, որ Ամերիկան կորցրել է այլ երկրներին ինչ-որ բան սովորեցնելու իրավունքը: Արևմուտքը, հարկ եղած դեպքում, միշտ էլ փորձում է որոշակիորեն քննադատել Ադրբեջանին՝ մարդու իրավունքների ցածր մակարդակն օգտագործելով որպես լծակ՝ ազդելու Ադրբեջանում տեղի ունեցող որոշակի պրոցեսների վրա: Այսպիսի հայտարարությունների դեռ շատ ականատես կլինենք: Դա չէի անվանի լարվածություն, այլ՝ մեծ աշխարհաքաղաքական խաղի կամ մեծ դիվանագիտության որոշակի բաղկացուցիչ մաս»:
