Այսօր Ուելսում մեկնարկում է ՆԱՏՕ-ի գագաթաժողովը
BBC Russian-ի փոխանցմամբ՝ այսօր Ուելսում մեկնարկում է ՆԱՏՕ-ի գագաթաժողովը: Գագաթաժողովի բացումից առաջ Ուկրաինայի նախագահ Պյոտր Պորոշենկոն ՆԱՏՕ-ի երկրների առաջնորդներին պատմելու է Ուկրաինայում տիրող իրավիճակի և Ռուսաստանի նախագահ Վլադիմիր Պուտինի հետ իր հեռախոսազրույցի մանրամասների մասին:
Ակնկալվում է, որ գագաթաժողովի ժամանակ հավանության է արժանացվելու ՆԱՏՕ-ի արագ արձագանքման ուժերի (մոտ 10.000 զինծառայող) ստեղծումը, որոնք նախատեսված են Արևելյան Եվրոպայի երկրները ռուսական հնարավոր ագրեսիայից պաշտպանելու համար:
Գագաթաժողովի օրակարգը գրեթե ամբողջովին նվիրված է լինելու Ուկրաինայի հարցին: Սրանից առաջ ՆԱՏՕ-ի գլխավոր քարտուղար Անդերս Ֆոգ Ռասմուսենը հայտարարել էր, որ Ուկրաինայի ճգնաժամի խաղաղ կարգավորման Պուտինի պլանն անկեղծ չէ, և որ ռուսական կողմը շահագրգռված չէ Ուկրաինայում հրադադարի հաստատմամբ:
