Պենտագոնն Ուկրաինայի համար պատրաստել է ՀՕՊ-ի միջոցների գտնվելու վայրերի մասին տվյալներ. The New York Times
Ամերիկյան The New York Times թերթի փոխանցմամբ` Պենտագոնն ու ԱՄՆ-ի հատուկ ծառայությունները պլան են մշակում, որը հնարավորություն կտա Ուկրաինայի իշխանություններին իրազեկել երկրի արևելքում գործող զինյալների զենիթա-հրթիռային համալիրների գտնվելու վայրերի մասին:
Թերթն այս հարցում վկայակոչում է նախագահ Բարաք Օբամայի աշխատակազմի բարձրաստիճան ներկայացուցչի, որի խոսքերով` Վաշինգտոնը պատրաստ է տվյալ տեղեկատվությունը ներկայացնել Կիևին` զինյալների ՀՕՊ-ի միջոցներին ճշգրիտ հարվածներ հասցնելու համար:
Թերթի տվյալներով` համապատասխան առաջարկը դեռ չի քննարկվել Սպիտակ տանը: Դեռ հայտնի չէ, թե արդյոք Օբաման կհամաձայնվի Ուկրաինայի հետ հետախուզական տվյալների փոխանակմանը, քանի որ տվյալ քայլն ԱՄՆ-ին կներքաշի հակամարտության մեջ:
