ՄԱԿ-ի Անվտանգության խորհուրդը Boeing-ի կործանման հարցով բանաձեւ է ընդունել
ԻՏԱՌ-ՏԱՍՍ գործակալության փոխանցմամբ` ՄԱԿ-ի Անվտանգության խորհուրդը երկուշաբթի ուշ երեկոյան մալայզիական Boeing-ի կործանման հարցով բանաձեւ է ընդունել: Փաստաթուղթն ընդունվել է միաձայն. կողմ են քվեարկել ԱԽ 15 անդամ երկիր, այդ թվում` Ռուսաստանը:
Բանաձեւը վճռականորեն դատապարտում է գործողությունները, որոնք հանգեցրել են օդանավի կործանմանը եւ պահանջում է անցկացնել բազմակողմանի եւ անկախ հետաքննություն` «միջազգային քաղավիացիայի հիմնական սկզբունքներին համապատասխան»: Համաձայն բանաձեւի` ՄԱԿ-ի Անվտանգության խորհուրդը պահանջում է անմիջապես աղետի վայրում դադարեցնել բոլոր տեսակի ռազմական գործողությունները`միջազգային հետաքննչական խմբերի անվտանգությունն ապահովելու համար:
