Եվրախորհրդարանը քվեարկել է Ժան Կլոդ Յունկերի թեկնածության օգտին
Ռուսական Интерфакс լրատվական գործակալության փոխանցմամբ՝ Եվրախորհրդարանը հավանության է արժանացրել Լյուքսեմբուրգի նախկին վարչապետ Ժան Կլոդ Յունկերի թեկնածությունը Եվրահանձնաժողովի նախագահի պաշտոնում:
Դրանից առաջ Յունկերը ներկայացրել էր «Նոր մեկնարկ Եվրոպայի համար» իր ծրագիրը, որում ներկայացրել է տարբեր ոլորտներում Եվրահանձնաժողովի գործունեության 10 առաջնահերթությունները: Դրա հիմնական նպատակը եվրոպական ինտեգրման հետագա ամրապնդումն է, այդ թվում նաև արտաքին քաղաքականության ոլորտում:
Յունկերը կողմ է արտահայտվել ԵՄ-ի դիվանագիտության ղեկավարի լիազորությունների ընդլայնմանը: Նա արժանացել է եվրոթերահավատների խիստ քննադատությանը, սակայն դա նրան չի խանգարել քվեարկության արդյունքներով ստանալ ձայների մեծամասնությունը:
Նրա օգտին քվեարկել է 400 եվրոպացի պատգամավոր՝ անհրաժեշտ 376-ի պարագայում: Ներկա դրությամբ Եվրահանձնաժողովը գլխավորում է Ժոզե Մանուել Բառոզուն, որի լիազորությունների ժամկետն ավարտվում է նոյեմբերի 22-ին:
