Իրենց վստահված ոլորտներում առաջընթաց ապահովելու փոխարեն փնովում են այլոց աշխատանքը. Սպորտի նախարությունն արձագանքում է Ռ. Հայրապետյանին

ՀՀ սպորտի և երիտասարդության նախարարությունը պատասխանել է Հայաստանի ֆուտբոլի ֆեդերացիայի նախագահ Ռուբեն Հայրապետյանին: Հիշեցնենք, որ Ռ. Հայրապետյանը News.am-ին տված հարցազրույցում սպորտի նախարար Գաբրիել Ղազարյանի մասին ասել էր. «Ի՞նչ կապ ունի նա սպորտի հետ, ի՞նչ է հասկանում սպորտի պրոբլեմներից, դե թող մեկը քննադատի, ինչո՞ւ չեն քննադատում: Տարվա վերջին գալու է մի աղջիկ ծաղիկ մատուցի, թուղթ մատուցի, տա սպորտի նախարարին եւ ստացվի, որ այդ աղջիկն է անում նախարարի գործը: Ազնվորեն ասեմ, որ չեմ էլ ճանաչում, դեմքով էլ չգիտեմ: Ինձ համար կուսակցական պատկանելիությունը նշանակություն չունի, կարեւորը լավ գործ անի հայկական սպորտի զարգացման համար, իսկ Գաբրիել Ղազարյանի դեպքում հույս չունեմ, որ նա լավ նախարար կարող է լինել, քանի որ սպորտի նախարարը չի կարող ինքնուրույն որոշումներ կայացնել»:

Ստորև ներկայացնում ենք ՀՀ սպորտի և երիտասարդության նախարարության արձագանքը.

* * *

Հարգելի՛ գործընկերներ.

Հերթական անգամ ականատես ենք լինում, երբ մարդիկ իրենց վստահված ոլորտներում առաջընթաց ապահովելու փոխարեն փնովում են այլոց աշխատանքը և անհիմն վատաբանում նրանց: Այս անգամ այդ պատիվ չբերող դերը ստանձնել է Հայաստանի ֆուտբոլի ֆեդերացիայի նախագահը: Հայկական ֆուտբոլի աղետալի վիճակից և իր անելիքներից խոսելու փոխարեն ֆեդերացիայի նախագահը կանխակալ վերաբերմունք է արտահայտում ՀՀ սպորտի և երիտասարդության հարցերի նորանշանակ նախարարի հանդեպ` նրան մեղադրելով սպորտի հետ կապ չունենալու մեջ:

Պարզապես հիշեցման կարգով նշենք, որ սպորտի նախարարը 1992 թվականից ֆիզիկական կուլտուրայի և սպորտի բնագավառում է`աշխատելով որպես ֆիզկուլտուրայի ուսուցիչ, բասկետբոլի մարզիչ, զբաղվել է գիտական աշխատանքով, դասախոս է, դոցենտ: Վատաբանելու փոխարեն կարելի էր ընդամենը հարցնել մարզաշխարհի ներկայացուցիչներից, թե պաշտոնավարման այսքան կարճ ժամանակահատվածում ինչ տպավորություն է հասցրել թողնել նախարարը` առաջնորդվելով մարզաշխարհում համերաշխության և փոխընբռնման մթնոլորտի ձևավորման անհրաժեշտությամբ:

Հիշեցնենք` ՀՀ Սպորտի և երիտասարդության հարցերի նախարարությունը ՀՀ կառավարության ծրագրերին համապատասխան վճռական է հայրենական սպորտում առաջընթաց և զարգացում ապահովելու գործում: Նախարարության որդեգրած քաղաքականության համաձայն՝ քայլ առ քայլ լուծվելու են կուտակված խնդիրները ` բարձր պահելով հայկական սպորտի պատիվը:

Մենք ոչ մի մարզաձևի հանդեպ խտրականություն չունենք և պատրաստակամ ենք օգնել նաև հայկական ֆուտբոլին, որտեղ ցավալի բացթողումներ և տապալումներ կան: Վերջին օրերին եվրագավաթներում ՀՀ բարձրագույն խմբի թիմերի անփառունակ արդյունքները դրա վառ ապացույցն են:

Հայկական սպորտն ունի վառ անցյալ, բավական հուսադրող ներկա և ապագա, բայց դրա համար պետք է աշխատել ու ոչ թե վատաբանել այլոց աշխատանքը:

ՀՀ սպորտի և երիտասարդության հարցերի նախարարի
մամուլի քարտուղար
Աստղիկ Մարտիրոսյան