Ջոն Քերին ժամանել է Աֆղանստան՝ հարթելու նախագահական ընտրությունների արդյունքների շուրջ ծագած վեճերը
France-Presse լրատվական գործակալության փոխանցմամբ՝ ԱՄՆ պետքարտուղար Ջոն Քերին անցած գիշեր ժամանել է Աֆղանստան, ուր նախագահական ընտրությունների արդյունքների շուրջ ծագած տարաձայնությունների պատճառով շարունակում է տիրել քաղաքական ճգնաժամ, որը սպառնում է վերաճել բաց դիմակայության:
Հուլիսի 7-ին Աֆղանստանում հրապարակվել են նախագահական ընտրությունների 2-րդ փուլի նախնական արդյունքները, որոնց համաձայն, հաղթել է ֆինանսների նախկին նախարար Աշրաֆ Գանի Ահմադզայը: Սակայն մյուս թեկնածու, նախկին արտգործնախարար Աբդուլլահ Աբդուլլահը հայտարարել է զանգվածային ընտրակեղծիքների մասին և պնդում է, որ հաղթել է հենց ինքը:
Նա նաև հայտարարել է, որ մտադիր է ձևավորել սեփական կառավարություն՝ չնայած հայտարարված արդյունքներին: Ի պատասխան՝ Քերին հայտարարել է, որ ԱՄՆ-ի համար ընդունելի չեն «զուգահեռ կառավարություն» ձևավորելու ակնարկները: Քերիի խոսքերով՝ ԱՄՆ-ը պահանջում է, որ ընտրական հանձնաժողովները ամբողջականորեն ու մանրակրկիտ հետաքննեն ընտրախախտումների մասին բոլոր մեղադրանքները:
