Արևշատ գյուղում ավտոմեքենան հարվածել է գազատարին. կան տուժածներ

Հունիսի 20-ին, ժամը 22.39-ին ահազանգ է ստացվել, որ Արարատի մարզի Արևշատ գյուղում՝ գինու գործարանի մոտակայքում տեղի է ունեցել ՃՏՊ. ավտոմեքենան հարվածել է գյուղը սնուցող գազատար խողովակին, ինչից տեղի է ունեցել արտահոսք՝ բռնկումով:

Դեպքի վայր է մեկնել երկու մարտական հաշվարկ:  Պարզվել է, որ Պարույր Սևակի փողոցի թիվ 13 տան դիմաց, դեռևս չբացահայտված հանգամանքներում, «Մերսեդես» մակնիշի 31TT011 պ/հ (վարորդ Ն. Ա.) ավտոմեքենան դուրս է եկել ճանապարհի երթևեկելի մասից և բախվել գազատար գլխավոր խողովակին, ինչից տեղի է ունեցել գազի արտահոսք՝ հրդեհի բռնկմամբ: ՃՏՊ-ի հետևանքով Ն.Ա.-ը (ծնվ.1994թ.) և Ա. Վ.-ը (ծնվ. 1994թ.) տարբեր աստիճանի այրվածքներով տեղափոխվել են Արտաշատի բժշկական կենտրոն, որտեղ ստանալով համապատասխան բուժօգնություն՝ դուրս են գրվել:
Հրդեհը մեկուսացվել է ժամը 23.24-ին, մարվել՝ 23.35-ին: Այրվել է ավտոմեքենան՝ ամբողջությամբ:

Արտակարգ իրավիճակների նախարարություն