Իրանն անթույլատրելի է համարում Կասպից ծովում ոչ ափամերձ երկրների զինված ուժերի առկայությունը. Զարիֆ
Ռուսական ИТАР-ТАСС լրատվական գործակալության փոխանցմամբ՝ Իրանն անթույլատրելի է համարում Կասպից ծովում ոչ ափամերձ երկրների զինված ուժերի առկայությունը: Այս մասին այսօր Մոսկվայում հայտարարել է Իրանի արտգործնախարար Մոհամմադ Ջավադ Զարիֆը, ով մասնակցել է Մերձկասպյան երկրների նախարարական հանդիպմանը.
«Տարածաշրջանում խաղաղության ու ամուր կայունության երաշխիքի համար հիմնական նախադրյալներն են Կասպի ծովը խաղաղության, բարեկամության ու կայունության ծովի վերածելը, սպառազինությունների մրցավազքից հրաժարվելը և ոչ ափամերձ երկրների զինված ուժերի ներկայության անթույլատրելիությունը: Իսկ անվտանգությունն ինքնին բերում է տնտեսական բարգավաճում:
Դժբախտաբար, ոչ տարածաշրջանային մի շարք խաղացողներ Կասպիցը դիտարկում են միայն որպես նավթի ու գազի աղբյուր՝ մոռանալով բնապահպանության մասին: Իրանը ելնում է նրանից, որ Կասպիցի հարցերի լուծման ժամանակ անհրաժեշտ է ձեռնարկել այնպիսի քայլեր, որոնք կապահովեին բազմակողմ, երկարաժամկետ ու հավաքական շահերը:
Կասպիցի նոր, իրավական կարգավիճակը պետք է համապատասխանի ափամերձ երկրների ժողովուրդների սպասումներին ու կարիքներին»:
