Դուք միլիոնավոր մարդկանց անվանել եք ահաբեկիչներ. Յանուկովիչը՝ Կիևին
Интерфакс-Украина-ի փոխանցմամբ՝ Ուկրաինայի նախկին նախագահ Վիկտոր Յանուկովիչը կոչ է արել անհետաձգելի միջոցներ կիրառել՝ կապված Ուկրաինայի արևելքում ստեղծված իրավիճակի հետ: Այս մասին նշվել է Դոնի Ռոստովում նրա տարածած հայտարարությունում:
Յանուկովիչը թվարկել է տվյալ միջոցները՝ Ուկրաինայի բոլոր զինված ուժերի հետ քաշում դեպի դրանց կենտրոնացման վայրեր, Ուկրաինայի արևելքից այսպես կոչված ազգային գվարդիայի դուրս բերում, արևելյան շրջանների առաջնորդների հետ անհապաղ երկխոսության սկսում:
Յանուկովիչն իր այս պահանջները հասցեագրել է նրան, ով իրեն իշխանություն է համարում Կիևում. «Դուք մեկ քայլով եք հեռու արյունահեղությունից: Արյունը չի ջնջնվում: Կա՛նգ առեք: Ուկրաինայի արևելքում զենք կիրառելն արդեն ոչինչ չի փոխի:
Մարդիկ վիրավորված են: Դուք միլիոնավոր մարդկանց անվանել եք ահաբեկիչներ: Մարդիկ չունեն այլ ճանապարհ՝ բացառությամբ իրենց իրավունքների, իրենց կյանքի ու իրենց երեխաների համար պայքարելու»:
