Պորոշենկոյի ընտրական շտաբը Տիմոշենկոյին կոչ է արել հանել սեփական թեկնածությունը
Украинская правда-ի փոխանցմամբ՝ Ուկրաինայի նախագահի թեկնածու Պյոտր Պորոշենկոյի նախընտրական շտաբում կարծում են, որ նախկին վարչապետ Յուլյա Տիմոշենկոն պետք է հանի իր թեկնածությունը՝ հօգուտ Ուկրաինայի ժողովրդի միասնության:
Այս մասին այսօր լրագրողների հետ զրույցում հայտարարել է Պորոշենկոյի կենտրոնական ընտրական շտաբի ղեկավար Վիտալի Կովալչուկը: Նա հավելել է, որ եթե Տիմոշենկոն ընդհանրապես համաձայնվի դիտարկել այդ հարցը, ապա այդ ժամանակ տվյալ խնդրի շուրջ որոշակի բանակցություններ կանցկացվեն Պորոշենկոյի ու Տիմոշենկոյի միջև:
Կովալչուկն ընդգծել է, որ Պորոշենկոյի վարկանիշն ավելի բարձր է, և հետևաբար Տիմոշենկոն պետք է հանի իր թեկնածությունը: Ուկրաինայում նախագահական վաղաժամ ընտրություններն անցկացվելու են մայիսի 25-ին:
