Իր գործողություններով Պուտինը ցանկանում է Եվրոպան վերադարձնել 20-րդ դարի «դժոխք». Սիկորսկի
Ամերիկյան CNN հեռուստաալիքին տված հարցազրույցի ժամանակ Լեհաստանի արտգործնախարար Ռադոսլավ Սիկորսկին հայտարարել է, որ Ռուսաստանը ֆինանսավորում է Ուկրաինայում դիվերսիոն գործունեությունը:
Սիկորսկին ընդգծել է, որ Ղրիմում ու Ուկրաինայի արևելյան հատվածում երբեք գոյություն չի ունեցել էթնիկ որևէ խնդիր, մարդիկ հանգիստ կարողացել են խոսել ռուսերեն և դիտել ռուսական հեռուստաալիքներ:
Սիկորսկին կարծում է, որ Ռուսաստանի նախագահ Վլադիմիր Պուտինն Ուկրաինայում իր վերջին գործողություններով Եվրոպան սպառնում է վերադարձնել 20-րդ դարի «դժոխք»:
Սիկորսկին հիշեցրել է, որ այն ժամանակ դա առաջացել էր ազգային փոքրամասնությունների շահերը պաշտպանելու պատրվակով մի շարք երկրների կողմից իրենց սահմանները փոխելու ցանկության ի հայտ գալու պատճառով:
Նա հավելել է, որ արևմտյան աշխարհը պատրաստում է պատժամիջոցների երրորդ փաթեթը, եթե Ռուսաստանն ամեն դեպքում համարձակվի գնալ Ուկրաինայի դեմ հետագա ռազմական ագրեսիային:
