Այսօր մեկնարկում է Իրանի ու «Վեցյակի» միջև բանակցային երրորդ փուլը
Ռուսական ИТАР-ТАСС լրատվական գործակալության փոխանցմամբ՝ այսօր մեկնարկում է Իրանի ու «Վեցյակի» միջև բանակցային երրորդ փուլը, որի նպատակն է Իրանի միջուկային ծրագրի շուրջ համապարփակ համաձայնագրի մշակումը:
Ռուսական պատվիրակության ղեկավար, Ռուսաստանի փոխարտգործնախարար Սերգեյ Ռյաբկովը նախօրեին հայտարարել էր, որ լիովին իրատեսական է մինչև հուլիսի 20-ն այդպիսի համաձայնագիր ստորագրելը, և որ բանակցային ներկայիս փուլը բազա կստեղծի այդ փաստաթղթի տեքստի վրա աշխատելու համար:
«Վեցյակի» գործողությունները համակարգելու է ԵՄ-ի դիվանագիտության ղեկավար Քեթրին Էշթոնը: Իրանական պատվիրակությունը գլխավորում է արտգործնախարար Մոհամմադ Ջավադ Զարիֆը, իսկ ամերիկյան պատվիրակությունը՝ ԱՄՆ պետքարտուղարի՝ քաղաքական հարցերով տեղակալ Ուենդի Շերմանը:
