Երեկ մեկնարկեց Ուկրաինայի դեմ Ռուսաստանի հատուկ գործողությունների երկրորդ ալիքը. Տուրչինով
ZN.UA-ի փոխանցմամբ՝ Ուկրաինայի Գերագույն խորհրդի նախագահ, երկրի նախագահի պաշտոնակատար Ալեքսանդր Տուրչինովը հայտարարել է, որ Լուգանսկի, Դոնեցկի ու Խարկովի մարզերում վարչական շենքեր գրաված զինված անջատողականների հանդեպ իրականացվելու են հակաահաբեկչական միջոցառումներ.
«Այս գիշեր ստեղծվել է հակաճգնաժամային շտաբ, իսկ նրանց դեմ, ովքեր զենք են վերցրել, կանցկացվեն հակաահաբեկչական միջոցառումներ: Հաշվի առնելով տեղի իրավապահ մի շարք կառույցների պասսիվությունը՝ դրանք հավելյալ կկոմպլեկտավորվեն այլ շրջաններից բերված ստորաբաժանումների հաշվին: Անջատողական խմբավորումների գործողությունները կոորդինացնում են ռուսական հատուկ ծառայությունները:
Երեկ մեկնարկել է Ուկրաինայի դեմ Ռուսաստանի հատուկ գործողությունների երկրորդ ալիքը, որի նպատակը երկրում իրավիճակի անկայունացումն է, իշխանության տապալումը, ընտրությունների ձախողումը և երկրի մասնատումը: Դրա հետ կապված՝ ուժեղացվել է Ուկրաինայի արևելյան սահմանը»:
