Վրաստանի քաղաքացիներն առանց վիզայի կկարողանան Շենգենյան գոտու երկրներ մեկնել 2016 թվականից. Պետրիաշվիլի
Грузия Online-ի փոխանցմամբ՝ Վրաստանի քաղաքացիներն առանց վիզայի կկարողանան Շենգենյան գոտու երկրներ մեկնել 2016 թվականից: Այս մասին նախօրեին հայտարարել է եվրոպական ու եվրաատլանտյան կառույցներին Վրաստանի ինտեգրման հարցերով պետնախարար Ալեքսի Պետրիաշվիլին:
Նա հույս է հայտնել, որ վիզային ռեժիմի ազատականացման գործողությունների առաջին փուլը կավարտվի այս ամռանը, իսկ երկրորդը՝ հաջորդ տարի՝ նախքան Ռիգայում «Արևելյան գործընկերության» անդամ երկրների գագաթաժողովի անցկացումը:
Պետրիաշվիլիի խոսքերով՝ ոչ վիզային հաղորդակցությունը ներդրվելու է Վրաստանի բոլոր քաղաքացիների (այդ թվում աբխազների ու օսերի) և ոչ թե միայն առանձին կատեգորիայի մարդկանց համար: Նշվում է, որ Վրաստանը վիզային ռեժիմի ազատականացման գործողությունների պլանը ԵՄ-ից ստացել է 2013 թվականի փետրվարին:
