Յացենյուկը ՌԴ-ին առաջարկել է երկրորդ պետական լեզվի կարգավիճակ շնորհել ուկրաիներենին
Интерфакс-Украина-ի փոխանցմամբ՝ Ուկրաինայի վարչապետ Արսենի Յացենյուկը Ռուսաստանին առաջարկել է երկրորդ պետական լեզվի կարգավիճակ շնորհել ուկրաիներենին: Յացենյուկը դա հիմնավորել է նրանով, որ ուկրաինալեզու համայնքը խոշորագույնն է Ռուսաստանի տարածքում և հետևաբար ուկրաիներենին Ռուսաստանում պետք է շնորհել երկրորդ պետական լեզվի կամ էլ առնվազն հատուկ կարգավիճակ:
Յացենյուկը հավելել է, որ իրենք դիմում են Ռուսաստանի իշխանություններին՝ առաջարկելով այդ երկրի տարածքում բացել ուկրաինական դպրոցներ. «Ես տեսնում եմ, որ Ռուսաստանը շատ է մտահոգվում Ուկրաինայի սահմանադրության և ուկրաինական պետական կարգի համար: Մենք էլ իսկապես նույն կերպ մտահոգվում ենք մեր ռուս հարևանների համար»:
Յացենյուկի խոսքերով՝ Ուկրաինան պատրաստ է արտգործնախարարների մակարդակով Ռուսաստանի հետ բանակցություններին:
