Շվեյցարիայի դատախազությունը խուզարկել է Ռինատ Ախմետովի ժնևյան գրասենյակը
Sonntags Zeitung թերթի փոխանցմամբ՝ շվեյցարական դատախազությունը ստուգումներ է անցկացրել ուկրաինացի օլիգարխ Ռինատ Ախմետովի DTEK Trading S.A ընկերության ժնևյան գրասենյակում: Խուզարկումն իրականացվել է դեռևս փետրվարի 27-ին և տևել է երկու ժամ:
Խուզարկությունը կապված է եղել Ուկրաինայի նախկին նախագահի ավագ որդի Ալեքսանդր Յանուկովիչին պատկանող MakoTrading SA ածխային ընկերության գործունեության հետաքննման հետ: Շվեյցարական ոստիկանությունը գործ է հարուցել Ալեքսանդր Յանուկովիչի դեմ՝ նրան կասկածելով «փողեր լվանալու» մեջ:
DTEK-ի մամուլի ծառայությունը հաստատել է փաստաթղթերի խուզարկման փաստը: Թերթի տվյալներով՝ Ախմետովի ու Յանուկովիչի որդու ընկերությունները սերտորեն փոխգորածակցել են միմյանց հետ: Ախմետովը մեծապես ֆինանսավորել է Վիկտոր Յանուկովիչի ընտրական կամպանիան:
