ԵԱՀԿ Մինսկի խումբն այսօր կհանդիպի ռուսական կողմի հետ. Ուորլիք
Ադրբեջանական APA լրատվական գործակալության փոխանցմամբ՝ ԵԱՀԿ Մինսկի խմբի ամերիկացի համանախագահ Ջեյմս Ուորլիքը Twiiter-ի իր էջում գրել է, որ ԵԱՀԿ Մինսկի խմբի համանախագահները երեկ Մոսկվայում հանդիպել են Հայաստանի արտգործնախարար Էդվարդ Նալբանդյանի հետ:
Այդ հանդիպման ժամանակ համանախագահները Նալբանդյանին են ներկայացրել մարտի 10-ին Փարիզում Ադրբեջանի արտգործնախարար Էլմար Մամեդյարովի հետ իրենց հանդիպման արդյունքները:
Ուորլիքը գրել է. «Մոսկովյան հանդիպումը ցույց տվեց, որ Հայաստանը կողմնակից է Ղարաբաղյան հակամարտության խաղաղ կարգավորմանը: Համանախագահներն այսօր հակամարտության կարգավորման շուրջ հանդիպում կունենան ռուսական կողմի հետ»:
Հիշեցնենք, որ սրանից առաջ էլ Ուորլիքը հույս էր հայտնել, որ Հայաստանի ու Ադրբեջանի նախագահների հերթական հանդիպումը տեղի կունենա մարտին:
