Չինացիները ճապոնական ընկերություններից փոխհատուցում են պահանջում հարկադիր աշխատանքի համար
![](https://168.am/wp-content/uploads/2014/02/pic_409181e31b62267a90c0ab730aa7fdf3.jpg)
Ամերիկյան Associated Press լրատվական գործակալության փոխանցմամբ՝ Չինաստանի քաղաքացիները կոլեկտիվ հայց են ներկայացրել ճապոնական ընկերությունների դեմ՝ Երկրորդ համաշխարհային պատերազմի ժամանակ իրենց հարկադրաբար աշխատեցնելու համար:
Պեկինում դատարան են դիմել ճապոնական ձեռնարկությունների 37 նախկին աշխատողներ, նրանց սերունդներն ու շահագրգիռ այլ անձինք: Չինաստանի քաղաքացիները հուսով են ճապոնական Mitsubishi Materials Corp. և Nippon Coke & Engineering Co. ընկերություններից ստանալ մեկական միլիոն յուանի (163.000 դոլար) փոխանցում: Բացի այդ, տուժածները հուսով են, որ մամուլի միջոցով կհնչի պաշտոնական ներողություն:
Ճապոնիայի ԱԳՆ-ը հայտարարել է, որ հայցվորները չունեն հաջողության հասնելու հեռանկար, քանի որ հարկադիր աշխատանքի մասին գնահատականն արդեն իսկ տրվել է Երկրորդ համաշխարհային պատերազմից հետո երկու երկրների միջև ստորագրված համաձայնագրերում:
Ընդգծվում է, որ Երկրորդ համաշխարհային պատերազմի ժամանակ Ճապոնիայի կառավարությունը Չինաստանի տարածքից դուրս է բերել և հարկադրաբար իր ձեռնարկություններում աշխատեցրել է մոտ 40.000 մարդու: Նրանց աշխատեցրել են հանքահորերում, շինարարությունում ու ճապոնական 135 ընկերության խոշոր գործարաններում: Թերսնումից ու կոշտ վերաբերմունքից զոհվել է մոտ 7000 մարդ:
Հիշեցնենք, որ Չինաստանում որոշել են հիմնել Ճապոնիայի դեմ պատերազմում (1937-1945) տարած հաղթանակի տոն: