Արմեն Մովսիսյանը՝ «Նաիրիտի» մասին. Եթե Կառավարությունն ուզենար սնանկացներ՝ 3-4 տարի առաջ սնանկացման մոտիվները կային

««Նաիրիտը» միշտ եղել է Հայաստանի ամենախոշոր ընկերություններից մեկը թե խորհրդային, թե հետխորհրդային ժամանակներում: Ամենամեծը լինելով՝ ունեցել է  ամենածանր պրոբլեմները»,- ԱԺ ամբիոնից այս մասին հայտարարեց ՀՀ էներգետիկայի նախարար Արմեն Մովսիսյանը՝ «Նաիրիտի» հարցն ուսումնասիրող ժամանակավոր հանձնաժողովի ստեղծման մասին քննարկման ժամանակ:

Նրա խոսքով՝ «Նաիրիտում» աշխատում է 2500 մարդ, ուստի բնական է, որ ցանկացած խնդիր մեծ հնչեղություն է ստանում: «Բայց հնչեղություն ստանալն էլ իր ձևն ունի: Եթե այդ հնչեղությունը պիտի քաղաքական երանգ տա, ես համաձայն չեմ»,- անդրադառնալով ոչ իշխանական ուժերի ներկայացուցիչների քննադատություններին ասաց նա:

Նաև հավելեց. «Քաղաքական երանգ եք տալիս, ասում եք, թե Կառավարությունը որոշել է սնանկացնել «Նաիրիտը», Կառավարությունը որոշել է ժողովրդին քցել դռները, թալան կատարել այնտեղ: Եթե Կառավարությունն ուզենար սնանկացներ՝ 3-4 տարի առաջ սնանկացման մոտիվները կային, կարող էր սնանկացնել, ժողովրդին չէր պահի, կհաներ դուրս և կտար երկամսյա աշխատավարձերը»։

Նախարարի դիտարկմամբ՝ ԱԺ-ում սիրողական մակարդակում տրվեցին ամենատարբեր գնահատականները: «Դուք արդեն գնահատականներ եք տալիս, և տպավորություն է, որ հանձնաժողովի հաշվետվությունն ենք լսում»,- ասաց նա:

Ա. Մովսիսյանը հայատարարեց, որ «Նաիրիտում» ծրագիր է իրակացվում՝ «Ռոսնեֆտ» ըներության հետ, ուստի հանձնաժողով ստեղծեու ժամանակը չէ: «Ես գտնում եմ, որ ճիշտ չէ այս պահին որևէ հանձնաժողով ստեղծել և փորձել աշխատանքները խոչընդոտել։ Վերջապես գտնվել է ընկերություն, որը հնարավորւոթյուն ունի 500 մլն դոլարի ներդրում կատարել ընկերությունում»,- հայտարարեց նա։

Սակայն նախարարի խոսքը կիսատ մնաց, քանի որ ԱԺ նախագահ Հովիկ Աբրահամյանը որոշեց արտահերթ ելույթ ունենալ։