Ռուսաստանի ռազմաօդային ուժերի հրամանատարը չհայտարարված այցով ժամանել է Կահիրե
Թուրքական Dünya Bülteni լրատվական կենտրոնի փոխանցմամբ՝ այն բանից հետո, ինչ Եգիպտոսի պաշտպանության նախարար, ֆելդմարշալ Աբդել Ֆաթթահ աս-Սիսին այցելեց Մոսկվա և հանդիպեց Ռուսաստանի նախագահ Վլադիմիր Պուտինի հետ, ռուսական բարձրաստիճան ռազմական պատվիրակությունը մեկնել է Եգիպտոս:
Ընդ որում, այցից առաջ չի հայտարարվել, որ պատրաստվում է նման այց: Կահիրե մեկնած ռուսական ռազմական պատվիրակությունը գլխավորում է Ռուսաստանի ռազմաօդային ուժերի հրամանատար, գեներալ-մայոր Վիկտոր Բոնդարևը: Կահիրեի օդանավակայանում նրանց դիմավորել են Եգիպտոսի անվտանգության ուժերի բարձրաստիճան ներկայացուցիչներ:
Եգիպտոսի պաշտոնատար անձինք որևէ հայտարարություն չեն արել ռուսական ռազմական պատվիրակության ժամանման կապակցությամբ:
Հիշեցնենք, որ սրանից առաջ ռուսական Ведомости թերթը գրել էր, որ Ռուսաստանն ու Եգիպտոսը նախաստորագրել են ավելի քան 3 միլիարդ դոլարի սպառազինության ու ռազմական տեխնիկայի մատակարարման մասին պայմանագիր:
