Սիրիական ընդդիմությունը Ժնևում ներկայացրել է անցումային կառավարության մասին փաստաթուղթը
Ռուսական РИА Новости լրատվական գործակալության փոխանցմամբ՝ սիրիական ընդդիմության պատվիրակությունը ժնևյան բանակցությունների ժամանակ փաստաթուղթ է ներկայացրել, որում առկա են կոնկրետ առաջարկներ երկրում ժամանակավոր անցումային ղեկավար մարմին ձևավորելու մասին:
Այս մասին հայտարարել է Ազգային դաշինքի ներկայացուցիչ Լուայ Սաֆին. «Մենք ներկայացրել ենք գլխավոր փաստաթուղթը, որը կոնկրետ քայլեր ու սկզբունքներ է պարունակում անցումային ղեկավար մարմնի ձևավորման համար: Այն բաղկացած է 22 կետից»:
Սաֆիի խոսքերով՝ այդ փաստաթուղթը ներկայացվել է Սիրիայի գծով ՄԱԿ-ի ու ԱՊԼ-ի հատուկ ներկայացուցիչ Լախդար Բրահիմիին, ով Ժնևում Սիրիայի կառավարության ու ընդդիմության պատվիրակությունների միջև հանդես է գալիս որպես միջնորդ:
Սաֆին ընդգծել է, որ Սիրիայի կառավարությունը դեռ ոչ մի կերպ չի արձագանքել դրան:
