Կիևը հիմնականում կիսում է ԵՄ-ի Խորհրդի արած հայտարարությունը
Ուկրաինական UNIAN լրատվական գործակալության փոխանցմամբ՝ Ուկրաինայում ուշադրության են արժանացրել փետրվարի 10-ին ԵՄ-ի Խորհրդի նիստի եզրակացությունները: Այս մասին ճեպազրույցի ժամանակ հայտարարել է Ուկրաինայի ԱԳՆ-ի տեղեկատվական քաղաքականության դեպարտամենտի տնօրեն Եվգենի Պերեբիյնիսը:
Վերջինիս խոսքերով՝ իրենք ընդգծել են ԵՄ-ի հավասարակշիռ ու կառուցողական դիրքորոշումն Ուկրաինայի իրադարձությունների կապակցությամբ: Նա հավելել է, որ Ուկրաինայի կառավարությունը կիսում է քաղաքական ճգնաժամից Ուկրաինայի դուրս գալու վերաբերյալ ԵՄ-ի Խորհրդի արած եզրակացությունների մեծ մասը:
Մասնավորապես, ուկրաինական կողմը համաձայն է երկխոսություն անցկացնելու, բռնությունները դադարեցնելու, ինչպես նաև խաղաղ բնույթի ակցիաներ անցկացնելու անհրաժեշտության հարցում ԵՄ-ի դիրքորոշմանը:
