ԱՄՆ սենատը դեկտեմբերի 17-ին դիտարկելու է փոխզիջումային բյուջեն
Ռուսական РИА Новости լրատվական գործակալության փոխանցմամբ՝ ԱՄՆ սենատը դեկտեմբերի 17-ին դիտարկելու է փոխզիջումային բյուջեն, որն ընդունվել է Ներկայացուցիչների պալատի կողմից: Այս մասին երեկ հայտարարել է Սենատում դեմոկրատական մեծամասնության առաջնորդ Գարրի Ռիդը:
Բյուջետային օրենքը կարող էր դիտարկվել արդեն այս շաբաթ, սակայն Սենատը զբաղված է եղել նախագահ Բարաք Օբամայի առաջադրած կառավարական պաշտոններում թեկնածությունների հաստատմամբ:
Ներկայացուցիչների պալատի կողմից հավանության արժանացած բյուջետային համաձայնագիրը հնարավորություն կտա խուսափել 63 միլիարդ դոլարի ծախսերի կրճատումից: Այն նախատեսում է նաև առաջիկա 10 տարվա ընթացքում ԱՄՆ 17 տրիլիոն դոլար կազմող պարտքի խորհրդանշական (20 միլիարդ դոլարով) նվազեցում:
