Ամանորի նախաշեմին թանկացումներ դեռ չկան. Արտակ Շաբոյան
Տնտեսական մրցակցության պաշտպանության պետական հանձնաժողովն (ՏՄՊՊՀ) Ամանորի նախաշեմին ամենօրյա կտրվածքով մոնիթորինգ է սկսել բարձր կենտրոնացվածություն ունեցող և սոցիալական նշանակության ապրանքների (ձու, կաթնամթերք և այլն) շուկաներում: Այսօր լրագրողների հետ ճեպազրույցում հանձնաժողովի նախագահ Արտակ Շաբոյանը հավաստիացրեց, որ չարաշահումների դեպքում բոլոր տնտեսվարողները կենթարկվեն պատասխանատվության:
«Խոսքն այն շուկաներին է վերաբերում, որտեղ կան խոշոր ընկերություններ և գերիշխող դիրք ունեցող տնտեսվարողներ: Խոսքը չի վերաբերում մրցակցային շուկաներին: Մեր տվյալներով՝ էական գնային փոփոխություններ չկան»,- ասաց Շաբոյանը՝ հավելելով, որ գները ձևավորվում են առաջարկի և պահանջարկի հիման վրա, իսկ ՏՄՊՊՀ-ն միայն վերահսկում է, որպեսզի չլինեն չարաշահումներ գերիշխող դիրք ունեցող տնտեսվարողների կողմից:
Միաժամանակ, Ա.Շաբոյանը նկատեց, որ այս ժամանակաշրջանում խանութներում շատ են լինում զեղչերը, որոնք կեղծ են լինում և նշեց, որ դա անբարեխիղճ մրցակցություն է ու տնտեսվարողները պատասխանատվության են ենթարկվում ՏՄՊՊՀ-ի կողմից:
