Թուրքիան ու Իրանը համատեղ ստեղծում են ազատ տնտեսական գոտի
Թուրքական Sabah թերթի փոխանցմամբ՝ Թուրքիան ու Իրանը համատեղ ստեղծում են ազատ տնտեսական գոտի: Այս մասին հայտարարել է Թուրքիայի էկոնոմիկայի փոխնախարար Իբրահիմ Շենելը:
Վերջինիս խոսքերով՝ ներկայումս երկու կողմն էլ աշխատում են ազատ տնտեսական գոտու նախագծի վրա: Ավելի վաղ Թուրքիայի զարգացման նախարար Ջևդեթ Յըլմազը հայտարարել էր, որ Թուրքիան ու Իրանը կարող են ստեղծել ազատ տնտեսական գոտի:
Նրա խոսքերով՝ Անկարան ու Թեհրանը լավ հարաբերություններ ունեն բոլոր ոլորտներում, սակայն տնտեսական ոլորտը զարգացման հարցում հետ է մնում մյուս ոլորտներից: Յըլմազը հայտարարել էր, որ Թուրքիայի ու Իրանի տնտեսական հարաբերությունները ցածր են այդ երկրների պոտենցիալից:
2012 թվականին Թուրքիայի ու Իրանի միջև ապրանքաշրջանառության ծավալը կազմել է մոտ 22 միլիարդ դոլար: Ներկայումս կողմերը մտադիր են այդ ցուցանիշը հասցնել մինչև 35 միլիարդ դոլարի: Երկարաժամկետ հեռանկարում պլանավորված է ապրանքաշրջանառության ծավալը հասցնել մինչև տարեկան 100 միլիարդ դոլարի:
