Արդեն մի քանի տարի է Հայաստանը ամենավտանգավոր կիբեր տարածքներից է
Kaspersky Lab-ը հրապարակել է իր հերթական զեկույցը, որը հերթական անգամ ցույց է տալիս, որ համացանցում Հայաստանը շարունակում է մնալ ամենավտանգավոր երկներից մեկը։
Հաշվարկը կատարվում է ըստ այն համակարգիչների քանակի, որոնք ենթարկվում են հարձակման ինտերնետում։
Ինչպես 168.am-ի հետ զրույցում ասաց տեղեկատվական անվտանգության հարցերով փորձագետ Սամվել Մարտիրոսյանը`հասկանալի է, որ այստեղ խոսքն այն համակարգիչների մասին է, որոնց վրա հենց Կասպերսկի հակավիրուսային ծրագիր է տեղադրված։ Այս ամենը նշանակում է, որ հայաստանյան ինտերնետ օգտագործողները հաճախ են այցելում վարակված կայքեր:
«Հիմնականում դրանք կայքեր են, որտեղ կարելի է անվճար ներբեռնել վճարովի ծրագրային ապահովում կամ երաժշտություն: Վտանգը մեծ է նաև պոռնոգրաֆիկ բնույթի կայքերից»,- ասաց Ս. Մարտիրոսյանը` նշելով, որ արդեն մի քանի տարի է ՝ Հայաստանը առաջատարների մեջ է վտանգավոր կայքեր այցելելու տեսանկյունից:
Նա նշում է, որ ի տարբերություն նախորդ տարվա, այս տարի Ադրբեջանն է գրավել առաջին տեղը (նախորդ երկու տարիներին առաջին տեղում Ռուսաստանն էր)։ Ցանկում հայտնվել է նաև Վրաստանը, իսկ ԱՄՆ-ն, որը երկու տարի առաջ 3-րդ տեղում էր, այժմ իջել է 25-րդ տեղ։
Նշենք, որ ըստ նոր հրապարակված զեկույցի առաջին տեղում է Ադրբեջանը, երկրորդում` Ղազախստանը, իսկ երրորդ տեղում` Հայաստանը:
