Անտարկտիդայում գրանցվել է ռեկորդային ցածր ջերմաստիճան
The Sunday Times թերթի փոխանցմամբ՝ Անտարկտիդայում՝ ճապոնական հետազոտության գոտում, գրանցվել է ռեկորդային ցածր ջերմաստիճան՝ – 91.2 աստիճան Ցելսիուս: Դա Երկրի մակերևույթին ֆիքսված բոլոր ջերմաստիճաններից ամենացածրն է:
Ջերմաստիճանի չափումն իրականացրել է Ձյան և սառույցի չափման ամերիկյան ազգային կենտրոնը (America’s National Snow and Ice Data Centre)՝ արբանյակային տվյալների հիման վրա:
Մասնագետներն ընդգծել են, որ ռեկորդային ջերմաստիճանը գրանցվել է ծովի մակարդակից մոտ 3720 մետր բարձրության վրա՝ պարզ, ոչ քամոտ եղանակային պայմաններում:
Բացասական ջերմաստիճանի նախորդ ռեկորդը գրանցվել է 1983 թվականին, խորհրդային «Վոստոկ» կայանի հետազոտության գոտում՝ – 89.2 աստիճան Ցելսիուս:
