Վրաստանի կառավարությունն աջակցություն է հայտնել Եվրախորհրդարանի ընդունած բանաձևին
Грузия Online-ի փոխանցմամբ՝ Վրաստանի կառավարությունը ողջունել է երեկ Եվրախորհրդարանի ընդունած բանաձևը, որում աջակցություն է հայտնվում ԵՄ-ի հետ Ասոցացման համաձայնագիր նախաստորագրելուն և ընդգծվում են ԵՄ-ի պարտավորությունները «Արևելյան գործընկերության» մասնակից երկրների հանդեպ:
Վրաստանի կառավարության տարածած հայտարարությունում նշված է, որ Վիլնյուսում կայանալիք «Արևելյան գործընկերության» գագաթաժողովից առաջ նման բանաձև ընդունելը հանդիսանում է այն առաջընթացի վկայության ցուցիչ, որին Վրաստանը հասել է Ասոցացման համաձայնագրի կնքման ճանապարհին:
Բացի այդ, բանաձևն ընդգծում է այն, որ Եվրախորհրդարանն աջակցում է առաջիկա գագաթաժողովում Վրաստանի ու ԵՄ-ի միջև Ասոցացման համաձայնագրի նախաստորագրմանը:
Վրաստանի կառավարության հայտարարությունում ուշադրություն է հրավիրվում նրա վրա, որ այդ բանաձևն ընդունվել է հոկտեմբերի 27-ին Վրաստանում կայանալիք նախագահական ընտրություններից օրեր առաջ:
