Ջոն Քերին և Բենիամին Նեթանյահուն Հռոմում կքննարկեն Իրանի միջուկային ծրագրի հարցը
Ռուսական РИА Новости լրատվական գործակալության փոխանցմամբ՝ այսօր Հռոմում հանդիպելու են ԱՄՆ պետքարտուղար Ջոն Քերին և Իսրայելի վարչապետ Բենիամին Նեթանյահուն: Հանդիպման ժամանակ կողմերի ուշադրության կենտրոնում են գտնվելու Մերձավոր Արևելքում տիրող իրավիճակը, Սիրիայի քիմիական զենքի ոչնչացման հարցը, ինչպես նաև Իրանի միջուկային ծրագրի հարցը:
Հանդիպումից առաջ Նեթանյահուն հայտարարել է. «Մենք բոլորս շահագրգռված ենք Մերձավոր Արևելքի տարածաշրջանում խաղաղության ու կայունության հաստատմամբ: Դա այն թեմաներից մեկն է, որը ես ցանկանում եմ քննարկել ԱՄՆ պետքարտուղար Ջոն Քերիի հետ:
Մենք կշոշափենք Պաղեստինի հետ խաղաղ կարգավորման հարցը, ինչպես նաև այլ խնդիր, որը ներկայումս գտնվում է ուշադրության կենտրոնում՝ քիմիական ու միջուկային զենքի ոչնչացում: Իրանը, ինչպես երբեք, մոտ է միջուկային զենքի ստեղծմանը, ինչի համար էլ անհրաժեշտ է անհապաղ ձեռնարկել միջոցներ»:
