«Էյր Արմենիա»-ի առաջին օդանավը հոկտեմբերի 23-ին վայրէջք կկատարի «Զվարթնոց»-ում
«Էյր Արմենիա» ավիաընկերության առաջին օդանավը՝ Բոինգ 737-ը, հոկտեմբերի 23-ին վայրէջք կկատարի «Զվարթնոց» օդանավակայանում: Այս մասին 168.am-ին հայտնեցին ավիաընկերությունից:
Օդանավն առաջին ուղևորների փոխադրությունը կկատարի Երևան-Մոսկվա ուղղությամբ, հոկտեմբերի 27-ին: Չվերթի տոմսերն արդեն վաճառված են:
Հիշեցնենք, որ նախապես «Էյր Արմենիան» մտադիր էր բերել Airbus 320 օդանավ, սակայն դրա տեխնիկական տվյալները չեն բավարարել ընկերությանը և «Էյր Արմենիան» հրաժարվել էր այդ օդանավից:
Մինչ այս բեռնափոխադրումներով զբաղվող «Էյր Արմենիա» ընկերությունը հուլիսին ՀՀ քաղաքացիական ավիացիայի գլխավոր վարչությունից ստացել է Հայաստանից ուղևորափոխադրումներ իրականացնելու ժամանակավոր թույլտվություն: Այն թռիչքներ է իրականացնելու միայն դեպի Ռուսաստան՝ Մոսկվա, Սոչի, Կրասնոդար, Ռոստով, Սանկտ Պետերբուրգ և Սամարա քաղաքներ։
