ԱՄՆ-ը հերքել է Եգիպտոսին ռազմական օգնություն ցուցաբերելուց իր հրաժարվելու մասին տեղեկությունը
Ռուսական ИТАР-ТАСС լրատվական գործակալության փոխանցմամբ՝ ԱՄՆ վարչակազմը չի պատրաստվում ամբողջությամբ հրաժարվել Եգիպտոսին ռազմական օգնություն ցուցաբերելուց: Առաջիկա օրերին Վաշինգտոնը կպարզաբանի, թե կոնկրետ ինչպիսի օգնություն է ստանալու Կահիրեն:
Այս մասին երեկ հայտարարել է ԱՄՆ Ազգային անվտանգության խորհրդի պաշտոնական ներկայացուցիչ Քեյթլին Հեյդենը: Նա ընդգծել է, որ իրականությանը չի համապատասխանում այն տեղեկատվությունը, որ ԱՄՆ-ը դադարեցնում է Եգիպտոսին ռազմական օգնություն ցուցաբերելը: Նա հավելել է, որ առաջիկա օրերին իրենք կհայտարարեն, թե կոնկրետ ինչ օգնություն կցուցաբերվի:
Հեյդենի հայտարությունը չի բացառում այն, որ կկրճատվի Եգիպտոսին ցուցաբերվող ռազմական օգնությունը՝ կապված նախկին նախագահ Մոհամմեդ Մուրսիի գահընկեցության հետ: ԱՄՆ-ը տարեկան Եգիպտոսին հատկացնում է մոտ 1.5 միլիարդ դոլար: Այդ գումարից մոտ 1.3 միլիարդ դոլարը հատկացվում է ռազմական կարիքներին, իսկ մնացյալ մասը՝ տնտեսական կարիքներին:
