Թուրք-ադրբեջանական բարձր մակարդակի համագործակցության խորհրդի նիստը պլանավորված է նոյեմբերին
Ադրբեջանական APA լրատվական գործակալության փոխանցմամբ՝ Թուրք-ադրբեջանական բարձր մակարդակի համագործակցության խորհրդի հերթական նիստը պլանավորված է նոյեմբերի երկրորդ կեսին: Այս մասին հայտարարել է Ադրբեջանում Թուրքիայի դեսպան Իսմայիլ Ալփեր Ջոշքունը:
Վերջինիս խոսքերով՝ նախագահական ընտրությունների ավարտից հետո Ադրբեջանում կազմվելու է նիստի հատուկ պլանը: Դեսպանն ընդգծել է, որ այս տարի անպայմանորեն անցկացվելու է այդ նիստը:
Ջոշքունը մանրամասնել է, որ այդ նիստի ժամանակ քննարկվելու է համագործակցության լայն շրջանակ՝ քաղաքական, տնտեսական, մշակութային, կրթական բնույթի հարցեր:
Նշվում է, որ Թուրք-ադրբեջանական բարձր մակարդակի համագործակցության խորհրդի երկրորդ նիստը նախորդ տարի անցկացվել է Գաբալայում:
