Կոմանդոսին հորինել են որպես լեգենդ՝ մարտիկների մեջ ոգևորություն առաջացնելու համար. Սմբատ Այվազյան
Tert.am-ը զրուցել է «Տիգրան Մեծ» աշխարհազորային գնդի հրամանատար, ազատամարտիկ, «Հանրապետություն» կուսակցւթյան նախկին անդամ Սմբատ Այվազյանը հետ:
– Պարոն Այվազյան, Արկադի Տեր-Թադևոսյանն իր հարցազրույցներից մեկում նշել էր, որ Վազգեն Սարգսյանը Աստված չէր, մարդ էր, որն ուներ իր թերություններն ու մեծ արժանիքները: Այսինքն՝ ուզում եմ հարցս հստակեցնել՝ Վազգենը, այսպես կոչված, փակ թեմա՞ է ըստ Ձեզ: Եվ անկեղծանալու խնդիր չունե՞ր Կոմանդոսը:
– Ի՞նչ փակ թեմա, ո՛չ, բացարձակ փակ թեմա չէ Վազգեն Սարգսյանը: Վազգեն Սարգսյանը էս երկրինն է, էս ժողովրդինն է, և ցանկացած մարդ կարող է Վազգեն Սարգսյանի վերաբերյալ կարծիք արտահայտել: Կոմանդոսն ամեն անգամ ինչ-որ բան է խոսում, որն իրականությանը բացարձակ չի համապատասխանում, ամեն անգամ ինչ-որ կարծիքներ է արտահայտում, որոնք, կրկնում եմ, բացարձակապես իրականությանը չեն համապատասխանում: Թող ինքը իր թերությունների մասին խոսի, ոչ թե ամեն անգամ հիմարություններ դուրս տա …
– Այսուհանդերձ, Շուշիի ազատագրման ռազմական գործողությունը, որը համարվում է անթերի հայ ռազմարվեստի մեջ եզակի, ղեկավարվել է Ինքնապաշտպանության ուժերի (ԻՊՈւ) հրամանատար Արկադի Տեր-Թադևոսյանի կողմից՝ համաձայն էլեկտրոնային ազատ հանրագիտարանի։ Նա նաև արցախյան ազատամարտի չվարկաբեկված գեներալներից մեկի համարում ունի: Առնվազն մի քիչ այլ իմիջ ունի:
– Ո՞վ է ասում, որ նման համարում, վարկանիշ ուներ: Ուղղակի, չենք ուզել դրա մասին խոսել: Նաև, որովհետև լուրջ մարդու տեղ չենք դրել, չենք ուզեցել խոսել, հաշվի առնել, թե ո՞վ է նա, ի՞նչ է արել: Ընդհանրապես մի հատ հետաքննություն արեք՝ Կոմանդոսը որքան ժամանակ է եղել ճակատում: Եվ նաև իմ ուղեղի մեջ չի կարող տեղավորվել, որ Կոմանդոսը կարող է կարծիք հայտնել լեգենդար Գուրգեն Դարիբալթայանի մասին: Ինչ-որ դաշտային հրամանատարը փորձում է խոսել, թե երկրի նախագահը այսպես արեց, երկրի պաշտպանության նախարարը այնպես արեց: Ընդամենը մի հատ դաշտային հրամանատար ես եղել, այ տղա:
– Բայց Շուշիի ազատագրումը կապվում է նրա անվան հետ:
– Կապվում է, որովհետև լեգենդ ստեղծվեց, որ ռազմաճակատում ոգևորություն առաջացնենք: Ընդամենը դա: Միշտ էլ պատերազմների ժամանակ ինչ-որ մեկին վերցնում են, լեգենդ են սարքում, որ ոգևորության ալիք լինի:
Հարցազրույցն ամբողջությամբ կարող եք կարդալ սկզբնաղբյուր կայքում:
