«Տաշիրը» ճանաչվել է ՌԴ առևտրային անշարժ գույքի «թիվ 1 դևելոփերը»
Commercial Real Estate Companies Rating 2013 վարկանիշի համաձայն՝ «Տաշիր» ընկերությունների խումբը զբաղեցրել է առաջին տեղը՝ Ռուսաստանի առևտրային անշարժ գույքի ոլորտում գործող դևելոփերական ընկերությունների ցանկում։
Վարկանիշը կազմվել է առաջատար դևելոփերական ընկերությունների 2012 թվականի արդյունքների հիման վրա։
Վարկանիշում տեղ են գտել այն ընկերությունները, որոնք ամենից շատ քառակուսի մետր գրասենյակային, առևտրային և պահեստային տարածքներ են շահագործման հանձնել Ռուսաստանում նախորդ տարվա ընթացքում։ Առևտրային նշանակության տարածքների սեգմենտում անվիճելի առաջատարը «Տաշիրն» է՝ Ռուսաստանի տարբեր քաղաքներում թվով 6 «Rio» համալիրների շնորհիվ, որոնց ընդհանուր մակերեսը 370 հազար քմ է։
«Տաշիրը» հանդիսանում է Ռուսաստանի խոշորագույն առևտրային-ժամանային համալիրի սեփականատերը։ Այս պահի դրությամբ «Տաշիրն» արդեն ավարտել է առևտրային համալիրների 28 նախագծեր, այդ թվում՝ 18 «Rio» Ռուսաստանի տարբեր քաղաքներում։
2012 թվականը «Տաշիրի» համար բավականին արդյունավետ է եղել։ Շահագործման են հանձնվել 11 օբյեկտներ՝ մոտ 800 հազար քմ ընդհանուր մակերեսով։ Բացի 6 «Rio» համալիրներից՝ շահագործվել են Dalma Garden Mall առևտրային համալիրը (Երևան ), «Գազօյլ Սիթի» և «Դիրիժաբլ» բնակելի համալիրները (Մոսկվա), SK Royal հյուրանոցը (Յարոսլավլ) և այլն։
Ընկերության հասույթը 2012 թվականին կազմել է 2.9 միլիարդ դոլար, իսկ ներդրումների ընդհանուր ծավալը՝ 1.4 միլիարդ։
Հիշեցնենք, որ «Տաշիրի» հիմնադիրն ու սեփականատերը ռուսաստանաբնակ հայազգի գործարար Սամվել Կարապետյանն է։
