Աբովյանում աղբը փողոց է լցվում
Աբովյան քաղաքում հետիոտնի համար նախատեսված ոչ բոլոր անցումներն են գծված, միայն գլխավոր փողոցներում են թարմացվում դրանք: Քաղաքացիները հաճախ ստիպված են լինում անցումները հատել մայթեզրերի վրայով: Որոշ անցումներ էլ հատելիս քաղաքացին անմիջապես հայտնվում է աղբամանների տարածքում և ստիպված դրանք շրջանցում է այլ ճանապարհներով:
168.am-ի հետ զրույցում Աբովյանի քաղաքացիները իրենց դժգոհություն էին հայտնում ստեղծված տհաճ իրավիճակի կապակցությամբ: «Փողոցն ուզում ես անցնել, բայց ստիպված շրջանցում ես, որովհետև աղբ է դիմացդ: Ինչքանո՞վ է ճիշտ, որ աղբամանները հենց անցումի վրա են դրված, մի՞թե դժվար է մի քիչ կողքի վրա լինեն, մի՞թե չի կարելի փակ աղբամաններ շահագործել, որ ստիպված չլինենք այդ տհաճ հոտը շնչել, իսկ քամիների դեպքում ամբողջ աղբը փողոց է լցվում»,- ասաց Աբովյան քաղաքի բնակիչ Անահիտ Հարությունյանը:
Ի դեպ, աղբամանները հաճախակի չեն դատարկվում և կուտակված աղբը քամու հետ տարածքում ոտքի տակ է ընկնում:
