Իրանցի դպրոցականներին կսովորեցնեն որսալ անօդաչու թռչող սարքեր. Associated Press
Associated Press լրատվական գործակալության փոխանցմամբ՝ Իրանի Իսլամական հեղափոխության պահակազորի ղեկավարությունը հայտարարել է, որ մտադիր է ավագ դասարանի աշակերտների համար գործարկել անօդաչու թռչող սարքեր (ԱԹՍ) որսալու հիմքերի ուսուցման ծրագիր: Այս մասին հայտնել են տեղի ԶԼՄ-ները:
Իսլամական հեղափոխության պահակազորի գեներալ Ալի Ֆազլին հայտարարել է, որ համապատասխան առարկան կոչվելու է «պաշտպանության նախապատրաստում»: Ուսումնական կուրսի շրջանակներում դպրոցականներին դասավանդելու են ԱԹՍ-երին հետևելու և դրանց որսալու մեթոդները:
Մասնավորապես, երեխաներին սովորեցնելու են կոտրել համակարգչային ծածկագրերը, որոնց օգնությամբ ղեկավարվում են ԱԹՍ-երը: Գործակալությունն ընդգծում է, որ իրանցի զինվորականներն արդեն իսկ դասավանդում են տեղի դպրոցներում: Նրանք երեխաներին, մասնավորապես, սովորեցնում են քաղաքացիական պաշտպանության հիմքերը:
