ԵՄ-ի Խորհրդի որոշումը չի ազդի «Հզբոլլահի» տարածաշրջանային դերակատարության վրա. Իրանի ԱԳՆ
Ռուսական РИА Новости լրատվական գործակալության փոխանցմամբ՝ Իրանի ԱԳՆ-ը մեկնաբանել է ԵՄ-ի Խորհրդի կողմից լիբանանյան «Հզբոլլահ» շարժման ռազմական թևն ահաբեկչական կազմակերպությունների թվում ներառելը:
Իրանի փոխարտգործնախարար Հոսեին Ամիր Աբդոլահիանը հայտարարել է, որ այդ քայլը չի ազդի այն ռազմավարական դերակատարության վրա, որը տարածաշրջանում ունի խմբավորումը.
«Ընդունելով այդպիսի որոշում՝ ԵՄ-ը հաստատել է իր սխալ ըմբռնումը՝ կապված մերձավորարևելյան տարածաշրջանում տիրող իրավիճակի հետ»:
Իրանցի դիվանագետը վճռական աջակցություն է հայտնել Լիբանանում և տարածաշրջանում «Հզբոլլահի» իրականացրած դիմակայության քաղաքականությանը:
Հիշեցնենք, որ սրանից առաջ Իրանը «տարօրինակ» էր որակել «Հզբոլլահի» ռազմական թևն ահաբեկչական կազմակերպությունների թվում ներառելու վերաբերյալ ԵՄ-ի անդամ երկրների արտգործնախարարների ընդունած որոշումը:
