Եգիպտոսում իրականացված ռազմական հեղաշրջումից ամենաշատը տուժել է Կատարը. Financial Times
Բրիտանական Financial Times թերթի փոխանցմամբ` մեկ շաբաթ առաջ, երբ Կատարում տեղի ունեցավ իշխանափոխություն, շատերը սկսեցին մտավախություն հայտնել, որ նոր էմիր, 33-ամյա շեյխ Թամիմին հեշտ չի լինի տարաշածրջանի փոթորկոտ մթնոլորտում:
Արքայազնի թագադրման ժամանակ քչերն էին հիշում Եգիպտոսի մասին, որի կառավարությունն ընկավ Դոհայում անցկացված հանդիսավոր արարողությունից ուղիղ մեկ շաբաթ անց: Իշխանությունից Մոհամմեդ Մուրսիի և «Մուսուլման եղբայրների» հեռացումը հանդիսացավ ուժեղագույն հարված Կատարի ակտիվ արտաքին քաղաքականությանը:
Կահիրեն արաբական աշխարհի սիրտն է, և ողջ Հյուսիսային Աֆրիկայում «Մուսուլման եղբայրներին» Կատարի աջակցությունը եղել է Դոհայի արտաքին քաղաքականության գլխավոր ուղղությունը` սկսած «Արաբական գարնան» սկսվելուց: Կատարը Եգիպտոսին աջակցելու վրա ծախսել է ավելի քան 8 միլիարդ դոլար, և հանդիսացել է Մուրսիի գլխավոր հովանավորը:
