Հիլալ Մամեդովի պաշտպանները կոչով դիմել են Ադրբեջանում Իրանի դեսպանին
Ռուսական Regnum լրատվական գործակալության փոխանցմամբ՝ կալանքի տակ գտնվող թալիշական «Թոլիշի Սադո» (Թալիշի ձայն) թերթի և կայքի գլխավոր խմբագիր Հիլալ Մամեդովի Պաշտպանների հասարակական կոմիտեն դիմել է Ադրբեջանում Իրանի դեսպան Մոհսեն Փակ Այինին:
Այս մասին հայտարարել է տվյալ կոմիտեի ղեկավար Ռաֆիգ Ջալիլովը: Վերջինիս խոսքերով՝ իրենց դիմում կոչ է պարունակվում դիրքորոշում հայտնել Իրանի պետական մարմինների հետ Մամեդովի հանցավոր կապերի շուրջ տարվող հետաքննությանը: Կոմիտեն Իրանի դեսպանին խնդրում է շուտափույթ արձագանքել Մամեդովին ներկայացված տվյալ մեղադրանքին:
Հետաքննությունը պնդում է, որ Հիլալ Մամեդովին խոշոր չափի թմրանյութ է հատկացրել իրանական ETTELAT հատուկ ծառայությունը, ինչպես նաև Մամեդովի հետ սերտորեն համագործակցող, Իրանի ԱԳՆ-ի աշխատակից Հուսեին Ահմեդին և գիտնական Ալի Աբդոլին:
Հիշեցնենք, որ սրանից առաջ Հիլալ Մամեդովը հայտարարել էր, որ թմրանյութն իր գրպանը նետել են Ադրբեջանի իշխանությունները:
